Gen 22 | SWP | STEP | Ina ginauri ta muridi eai Eaubada lauita i mosei Aberahama arinai, i ribalau arinai ie ene, “Aberahama e!” I riba heuio i ene, “Eau ede ina.”

Genesis 22

Aberahama se Lauhesom bena Isaako i Aitalasamei

1 Ina ginauri ta muridi eai Eaubada lauita i mosei Aberahama arinai, i ribalau arinai ie ene, “Aberahama e!” I riba heuio i ene, “Eau ede ina.” 2 Eaubada i ene, “Natum u woeai, natu‐ese’esegam u gadosisie wa, Isaako, abo au lau tupo Moria eai, nei eai ia abo u moselaei em aitalasam gabugabuna oea tupina esau potana eai, sora abo ea heitam.” 3 Arinai Aberahama i toroheula maratomtom gagirina eai, ena asini abageruina ie au, ana hewari labui maenayao eo natuna Isaako i woeaesegaidi; oeagi i aitom aitalasam gabugabuna enana, abo se torohai se lau wau tupo wa Eaubada i heribayao wa arinai. 4 Asubena hehaionana eai Aberahama matana i helabaisinidi dimona wa ie ita eda lohaloha eai. 5 Abo Aberahama ena hewari i heribadi, “Inai au mia, asini maemiu; gama ta maegu abo ai lau nei eai ai aihelahui, abotai ai uioma arimiu eai.” 6 Abo Aberahama aitalasam gabugabuna oeagina ie abi ie tore natuna tau Isaako dabayarona eai; eo nimana eai oeagi ala’alasina eo nigo i abidi, abo taudi labui se lau esega. 7 Isaako i ribalau tamana arinai i ene, “Tamagu!” Aberahama i heuio, i ene, “Natugu, eau ede ina.” I ene, “Oeagi alaalasina ina eo oeagi augogona, na mamoe bena aitalasam gabugabuna mo haedi eai?” 8 Na Aberahama i ene, “Natugu e, Eaubada iabom mamoe esau aitalasam gabugabuna enana abo i henonohai.” To taudi labui se lau labulabui se lau.

9 Dimo wa Eaubada i ribaei wa arinai se lage, abotai Aberahama aba‐aitalasam i tarini, potana eai oeagi i hatai komakomanidi, natuna Isaako abo ie pai, eo i he’enosaei oeagi wa potadi eai. 10 Abotai Aberahama nimana i loloilaei nigo i abilau arinai natuna bena i unuhemate, 11 na GUIAU ena aneru galewa eai i eogalau, i ene, “Aberahama e! Aberahama e!” To i heuio, “Eau ede ina.” 12 I ene, “Nimam tabu u torelaei natum potana eai, eo tabu u sahai; paana ea itayao ede, Eaubada u matausiei arinai natum ta, natueseesegam ta nige u nuahi arigu eai.” 13 Aberahama matana i helabaisinidi, i italau, na dagelana eai mamoe tamoana ie ita donana oeagi gagirina eai se aitala’ahi: Aberahama mamoe tamoana wa i toai i toresae ena aitalasam ie gabu, natuna helaudamaina. 14 Arinai dimo ne esana Aberahama ie tore ‘GUIAU enada abo i leama’, doha se ribaribaei i laoma e wauta, si ene, “GUIAU ena oea‐tupina eai enada abo se leama.”

15 GUIAU ena aneru ena eogahelabuina galewa eai, 16 I ene, “Eaubom enagu eai ea riba aigora, GUIAU i ribaei, paana laulau ta ue abi, to natum nige u nuahi, natueseesegam tau: 17 Mamohoi ariri abo ea ainauiaim, am isimurita abo ea hegamagaridi doha galewa iporadi, eo doha gelegele gabogabo hasarina eai wa. Am isimurita hinage abo adi waiunuyao edi dobila abo se tanuagaidi. 18 Eo oa am isimurita debadi eai tanoubu basileiadi gamagaridi abo se helolodi, paana arinagu u awaabiei.” 19 Arinai Aberahama ie uio ana hewari aridi eai to se torohai se lau esega se lau Biera‐siba, Aberahama ena aba mia Biera‐siba eai.

Nahora ana Isimurita

20 Ina ginauri ta muridi eai Aberahama se heriba, “Mileka hinage merumeru i labasidi em tau Nahora enana.” 21 Husa taubaguna, maena tau Busa, Kemuela, Arama tamana. 22 Kesa, Haso, Piledasa, Iedelapa eo Betuela. 23 Betuela abotai Rebeka tamana ede, tataodi haligigi haiona Mileka i labasidi Nahora enana, Aberahama ena tau. 24 Hinage ena wowosara esana Reumaha, ia Teba, Gaham, Tahasa eo Mahaka i labasidi.